Día internacional contra la violencia de xéneru

El día 25 d'esti mes celebróse'l día internacional contra la violencia de xéneru. Dende'l colexu quisimos facer un pequeñu actu nel que toos participaran d'un mou o otru, y asina foi como na hora del recréu nos xuntamos pa nun dexar pasar esí día.
Los mozos de secundaria lleeron un comunicáu en contra la violencia de xéneru, dalgo emotivo y mui bien ellaboráo por ellos.
Amás de too esto el nuesu profe de plástica, Alfonso, fizo un mural perguapu en conmemoraración a esi día. Delantre d'él los neños d'infantil y primaria fueron poniendo veles poles víctimes de la violencia de xéneru.
Sin dulda  foi un actu mui guapu pa un día que nun podemos escaecer.

Nel aula d'infantil decidióse trabayar daqué nesi día d'un mou un poco especial y ye asina como los neños y neñes de 3, 4 y 5 años disfrutaron , nuna pequeña asamblea, de la llectura del cuentu "¿Hay algo más aburrido que ser una princesa rosa?". El llibru fala de una neña ,Carlota" que taba cansada de ser una princesa rosa, que nun quería vistir solo de rosa, que quería cazar dragones y rescatar a príncipes, taba fartuca de ser princesa.
El cuentu dio pie a que cada neñu y neña contaran si ellos teníen ganes de ser princeses o ser príncipes y de qué collor-yos prestaría vistir. Les respuestes fueron sorprendentes, sobre too cuando una de les neñes de 4 años nos dixo qu'ella quería ser una bruxa y tener un mozu camioneru y bruxu, o cuando Nico de 5 años  afirmó qu'él sí quería una moza princesa, pero que fuera gordina, gordina, pero guapa .
Y ye que toos tenemos derechu a elexir lo que queremos, toos tenemos derechu a ser princeses roses, marielles, azules, a ser príncipes  o bruxos camioneros, a ser altos, pequeños, gordinos o flacos.

"Nun importa si rosa o azul...lo importante yes tu"

"Pallabres sin dicir" en Navelgas .

El pasáu Xueves 24 de Payares fízose la primer presentación de "Pallabres sin dicir". L'actu tuvo llugar  na casa de la Cultura de Navelgas. Agradezco muncho a la xente que m'apoyó esi día tan especial ya importante pa mi y la bona acoyida que tuvi. Presentar un llibru ye algo inolvidable y más inolvidable ye presentalu por primera vegada.
Gracies a toos.

La prósima presentación en casa :) .Vémonos en Mieres .

Día de monte.

L'otru día garramos la mochila, punximos les botes y bien ceo marchamos a facer una ruta bien guapa.


Dicen "que’l que tuvo retuvo" y paez ser qu’esto ye asina. Depués de tolos años nos que nun facía más que xubir picos y andar ente les piedres como les cabres, picóme'l guxán y nun dixi que non a la propuesta de mio pá. Prestóme pola vida volver a sentir esa sensación nes montañes y sobre too de pasar un día tan prestosu en buena compañía.

Dexamos el coche na " Curva les garrafes", a unos 2 km del pueblu quirosán de Ricabo, a eso de les 8 y cuartu la mañana , col sueñu tovía en cuerpu entamamos a caleyar pola viesca enllena ablanos ,castañales y fayes que taben tovía camudando'l collor de les fueyes.Pasamos poles Infiestes, la Vega L.laseiru onde paramos a facer el primer descansu y unes semeyes del paisaxe. Siguimos el camín pasando pola braña Buxalbe. Yá na "collada Lingleo" pudimos ver tolos puertos d'Agüeria y les montañes que los arrodian como Pena Rueda, Los Fontanes, Fariñentu y otros munchos picos. Pasamos pola Cardosina y la Cardosa onde tuvimos nunes cabanes nes que daba gana quedase y na fuente'l Nacimientu (onde naz el ríu L.lindes)llegó lo más prestoso: asamos unos chorizos pa xintar que mos dieron enerxía (y galbana) pa volver a baxar pol mesmu sitiu tranquilamente y disfrutando de los paisaxes tan guapos que tenemos n'Asturies.

Llegamos al coche a les 6 y media la tarde cuando yá entamaba a escurerer. Un día pa nun escaecer y pa encima ...¡sin aguyetes!

 Viesca

 La Vega L.laseiru

 La Cardosina

Vista del Fariñentu

Un suañu fechu realidá.

Al fin tengo nes manes el mio primer llibru. Gracies a Suburbia ediciones espublizo esti poemariu con tola ilusión del mundu, naguando porque-y preste a la xente y pensando en nuevos proyeutos.

Siempres hai un entamu , espero qu'esti suañu nun seya l'últimu y que depués d'esti vengan munchos más.

El tiempu les fabes

Enxamás hasta agora fici vida nun pueblu y ye agora cuando puedo dicir que soi feliz equí, que nun hai cosa que más me preste que les costumes, la xente y los díes nel pueblín.

Otru cursu más en Navelgas.

Segundu añu que trabayo de maestra, y segundu añu en Navelgas. Yá sabía yo qu'esti pueblín diba ser especial, y asina ye.

Otra vez nel colexu del que marché'l cursu pasáu con llárimes nos güeyos y naguando por volver y equí toi una vez más.

Munchos compañeros d'andances nuevos, otros volvemos a venos :)

Da gustu volver a ver a los neños y eses cares d'allegría.

...

Da gustu sentime parte d'esti pueblu.

Praia das Catedrais

"Depués de too nun tengo más coses qu'aquelles que quiero soñar"

Café-Antón García

Roma non basta una vita.

Fueron munches les veces que cerré los güeyos y quixi que parara’l tiempu, ellí, contigo, col soníu d’esi momentu, camentando que nun viera enxamás coses más maravioses que les que m'arrodiaben.

Xunu, un mes mui “apetecible” pa tolos que tamos en plenu estudiu d’oposiciones.


Sí, la verdá que ye perguapo y bien prestoso ser maestra y ser parte importante de la educación de munchos neños, pero esta carrera de fondu que va depués d’acabar la “carrera maxisteriu” ye lo que munches veces fai que pensemos qu’en realidá esto “ye una casa putes”, y nun se pue ser más finu nestos casos.

Lleguen momentos de falta de sueñu, de malos fumos, de tar malpenes sin vida social, les defenses polos suelos y esa sensación de nun saber nada depués de tar un añu preparando temes y más temes, pero sí, como bien diz una compañera del colexu : “así es la vida” xD.

Muncha suerte a tolos opositores y ánimu, dalgún día tendremos una plaza pa nós, y sinón...d’una mala xubilámonos d’interinos, que bien guapo ye preparar oposiciones ca 2 años, ¿non?  ;)

Pa la mio ayalga.

Suañé que yera capitana del tiempu.

Llevábame la mar navegando nun barcu de papel

 y estiraba’l pescuezu p’alcontrate nes ñubes.

Suañé que’l ríu nun terminaba nun charcu

y que les foles que soplaba esnalaben enriba les muries.

Suañé que yera capitana d’un barcu,

...d’un barcu pirata cargáu d’ayalgues

como ‘l rellume de los tos güeyos de nueche.

Ya esa nueche esperté y vite al mio llau

Navegando nes foles  qu’esnalen

nos besos al aire qu’esparce’l to arume.

Y quixi siguir nel mio barcu de papel,

suañando  ayalgues,

suañando los tos güeyos.

 -Cris M. M-

¿Malos tiempos pa la lírica?

Ye verdá que los qu'escribimos poesía solemos facelo cuando tamos atristayaos (paez una norma xeneral) y como bien me dixo un día una profesora y tamién escritora "ye que cuando tamos contentos préstanos facer otres coses y non escribir".

Fai tiempu que nun escribía, y ye que nun ye na cenciello que salgan les pallabres a bocanaes, pero nun se si tengo la virtú o’l defeutu de que cuando entamo a escribir nun paro.Un versu llama a otru versu y nun momentu apaez el poema. Mio pá diz que vien de familia...y pue que seya verdá, que dacuando salme una sensibilidá especial asemeyada a daquién ;) (y güei nun ye precisamente por tar murnia).

Toi a la espera de poder facer realidá un suañu...ye'l d'espublizar el mio primer poemariu (creo que bien ceo tendremos noticies yá seya pa bien o pa mal ), mientres tanto sigo faciendo la mio pequeña recopilación d'idees, de versos y soníos nos díes atristayaos y nun tanto.


Déxovos el mio primer poema espublizáu en "Lletres lliterariu 2" yá nel añu pasáu.

IVIERNU



Cai la ñeve


cai ente les mios manes,


blanques y fríes; tan fríes como xelu.


Cai nos teyaos d’estes cases,


nos teyaos del alma que


caltién el xorrecer del iviernu


y del tiempu d’agües.






Pel camín esnalen los mios pensamientos


y l’entemez d’imáxenes


qu’alcuentro nellos.






Abellúgome nos recuerdos


delles vegaes nes que xugaba y saltaba


baxo’l mantu blancu,


esti que piso agora,


esti que me terez de fríu nos costaos,

que me nubla los güeyos,

les idees y que me lleva

a tientes al so llau.

Cai la ñeve,

caen les hores…

…eses que nun quiero dexar pasar.

Cristina M.M

Día de les Lletres Asturianes.

Esti Vienres 6 de Mayu celebróse'l día de les Lletres Asturianes .
Siguimos pidiendo la oficialidá y lluchando por ella.
Nun me presta dicir "gallina", préstame dicir "pita" y nun me pruye dicir "niño" apetezme dicir "guah.e"...ye la mio llingua y nun siento vergoña d'ella.

                                                            ¡L'asturianu llingua oficial!

CONCIERTU POLA OFICIALIDÁ